الخميس، 22 يوليو، 2010

تجليات معزه في محل فول

المكان مذدحم بشده الجميع يتسابق من اجل الوصول الي غايته الثمينه
يصبح الحصول علي قرص طعميه بالسمسم او علبه فول بالخلطه امل يداعب بطون الجائعين من امثالي
علي مقربه يقف عامل الشاورمه غير مكترث بالحراره التي تلفح وجهه
وجدتها منكمشه في احد الاركان تجاهد علي استحياء وصوتها الذي يتوه وسط صرخات الزبائن
علبه فول ياعماد
2جبنه مقليه
بطاطس كاتشاب
سمراء تميل الي النحافه ترتدي حجاب عصري بادي كارينا وفستان بحمالات وايشارب صاخب الالوان
ميزني عماد وسط الموجودين اغلف البون بعمله معدنيه من جنيه التقطها في سرعه وهو يقول لزميله 2مخصوص وطبعا المخصوص هذا لا يظهر الا بعد ظهور العمله المعدنيه وتتراواح خصوصيته حسب قيمه العمله
تجرأت الفتاه ومدت يدها التي اصطدمت دون قصد بيد شاب بجوارها يرتدي جينز يبدو انه قد نسي وسطه في البيت او مايطلق عليه لو ويست مطلقا العنان لخصل شعره الاماميه المطليه بالفازلين وممسكا موبايل صيني من ابوكاميرا و خطين
ارتدت الفتاه في سرعه وهي ترمقه في استياء
التقط هو تلك النظره علي الفور واستدار بعد ان ظبط نبره صوته علي موجه اف ام " ايه حد قرب لك انتي اللي خبطتي فيا "
توهج وجها باحمر قاني وخرج صوتها مهزوز" طب لو سمحت حضرتك تروح بعيد شويه "
وقد انتفخت عروقه ربما بتاثير حضرتك " ايه اروح فين يعني انتي شايفه المكان واسع اوي "
تدخلت انا وقد وجدتها فرصه للتنظير واستخدام قدراتي البلاغيه التي كادت تصدأ من عدم الاستعمال
" ايه المشكله يعني بتقولك ابعد عنها شويه ماغلطتش ولا حاجه "
- يا استاذه ماهو ادامك اهو الدنيا زحمه وسيف بقي - يقصد صيف- يعني اسيب لها المحل عشان ترتاح
تدخل احد الموجودين يابني خلاص خد حاجاتك واتوكل علي الله
وهو يشوح بيده ياعم دي فكراني بعاكسها هو انا ناقص دي هي اللي خبطت فيا حتي اسالو المدام يقصدني انا
كنتيجه لاعتكار مزاجي بسبب كلمه مدام اجبت علي الفور" انا لا شوفت مين خبط ولا غيره انا شوفتك بتتخانق معاها "
همست الفتاه في اذني " انا ارجع البون خلاص مش مشكله "
اجتاحني انفعال وقد قررت نطبيق توصيات المجلس القومي للمراه والتحدث عن قضاياها وحقوقها في الحصول علي علبه فول بالخلطه
- ليه تتنازلي عن حقك وترجعي البون عشان زعق يعني وعلي صوته
رد احدهم خلاص يامدام حصل خير ملتفت الي عماد خلص الاخ خلينا نشوف مصالحنا بقي
انقذ عماد الموقف وهي يعطي الشاب طلبه الذي ما ان خرج حتي اشار لي امام الجميع
والمسحف يقصد والمصحف ماليا ذنب هي المدام دي اللي عملت المشكله
مالت علي الفتاه " مش عارفه من غيرك كنت عملت ايه كتر خيرك اوي "
انصرفت الفتاه بينا بقيت انتظر خروج البطاطس
التقطت الكيس من عماد منتشيه بما حققته من نصر في مجال حقوق الانسان

وبينما انا استدير لاعبر الطريق فؤجئت بالشاب وقد انتحي بالفتاه عند محل العصير المجاور يضحكان و يشربان المانجه وعينيه مثبته علي وجهها والذي مازال محتفظا بنفس النظره الخجوله وقد تلامست اصابعهما